بوعريشة كريمة

القصيدة الأولى

روحنيات رمضانية
هحكي واقول عن رمضان
ابدأ كلامي بأجمل سلام
نصلى ونسلم على خير الأنام
نبينا محمد رسول السلام
نشر دعوتة ومعاها محبته
وصانا نصلى ونصوم رمضان
فى شهركريم ماأحلاه
م السنه للسنه بنستناه
هحكى وأقول أيامى معاه
وذكرى فاتت عشتها وياه
قرأن وصوم ذكر وصلاه
وغفران ذنب قلب إتمناه
ولمة عيله حبها حساه
ودعوة أم بتشيل الآه
ونفحه حلوه فيه شماه
وطفل يلعب أنا شيفاه
بفانوس جميل الشمعه زيناه
ومافيش فيهم واحد زعلان
التراويح بتجمع المسلمين
فى الجوامع يصلوا وراضيين
لاتسمع شكوى ولاواحد تعبان
ربنا يقوينا على الصيام والقيام
ومانقولش غير احلى الكلام
والله بعودة رجوعك يارمضان
شهر الخير فى كل مكان
شهر الرحمة والغفران
هحكي واقول عن رمضان
خالد المنصوري مصر

القصيدة الثانية شكل الدنيا ف عينها

لما تشوف الدنيا فعينها
تلقى حياتك ليها ومنها
مين هيفكر أو يوم يقدر
يبعد يوم بين قلبى وبينها

لما تشوف الدنيا فعينها

لو يوم قالوا غرامك نار
حيره وغيره وباستمرار
مش راح أمشى مع التيار
بعد ماعاشت روحى فجنه

لما تشوف الدنيا فعينها

قلبى وشاف السكه منين
داق الفرحه وبعد سنين
عاش الضحكه مع العايشين
مين فى العالم زينا مين
خلى الفرقه تقول وحشنها

لما تشوف الدنيا فعينها

تحلم إن الثانيه تطول
ألفين غنوه نقول ونقول
حاسس إن الوقت عزول
لما بيجرى مابينى وبينها

شوفتوا إزاى الدنيا فى عينها
خالد المنصوري/مصر
14/4/2020

القصيدة الثالثة غيابك طال

غيابك طال ..  عن قلبي
و لأمتى عني راح تخبي
لا قربك ليا كان ذنبك
ولا بعادك  كان ذنبي

غيابك مقصود ..  ووحشاني
وساكنة شعوري وكياني
لا قادر يوم أكون جنبك
ولا في أحلامي سايباني

غيابك كسرني .. يا أغلى الناس
ده عشقك نهر من الأحساس
لا كافي ان أرتوي منك
ولا عارف أعيش وخلاص

غيابك سحرني .. يا جنية
يا مالية حياتي وعينيا
أموت لما بغيب عنك
ما  أنتي لروحي أغلي هديه

غيابك شاغلني .. يا محبوبة
حكايتي معاكي مكتوبة
لا ينفع يوم أقول إنك
دي قصة ومنها أهوه توبة

غيابك معذبني .. وبيكسرني
وطول الليل مسهرني
لا عارف أفهم إيه ظنك
ولا الغنوات تصبرني

غيابك طال  .. عن قلبي
و لأمتى عني راح تخبي
لا قربك ليا كان ذنبك
ولا بعادك  كان ذنبي
خالد المنصوري/مصر
7/4/2020

القصيدة الرابعة

بنده عليكي
روحت فين
مشتاق ليكي
أنا من سنين
.......................
ياسبب هنايا
أرجع معايا
طال  بكايا
زاد الأنين
........................
أرجع وخدني
شوقك حرمني
بعدك تعبني
ودموع عينين
.........................
أزي حالك
أنا مشتاقلك
دايما بحنلك
وقلبي حزين
.........................
معاك بالورود
حافظ الوعود
أرجع وعود
ضم الايدين
.........................
صورتك معايا
ساكنه جوايا
حلوه الحكايه
أحنا الاتنين
.........................
بنده عليكي
روحت فين
مشتاق ليكي
أنا من سنين

خالد المنصوري/مصر
2/4/2020

القصيدة الخامسة

الدنيا  أحلوت

الدنيا  أحلوت معاك
الأصوات عليت ليك
والأشجار أخضرت بيك
طرحت فل وياسمين
والعصافير غنت ليك
بست الحلوين .. ياأحلى الحلوين
..........................................
الأحزان فلت
والأفراح حلت
والناشفة أبتلت
بيك يانورالعين
بست الحلوين .. ياأحلى الحلوين
..........................................
جانى حسادى
يطالبوا بعادى
شيئ مش عادى
وفيك طامعين
بست الحلوين .. ياأحلى الحلوين
..........................................
مديتلك الايدين
وحلفت اليمن
مايفرق بينا اتنين
مخلوق لو هو مين
بست الحلوين .. ياأحلى الحلوين
..........................................
أنا ليك حبيت
بهواك أنتهيت
وبعشقك عليت
ولحزنى نهيت
بست الحلوين .. ياأحلى الحلوين
..........................................
شوقى ليك متين
تعالى ياضى العين
وأدينى قبلتين
وياك أعيش سنين
بست الحلوين .. ياأحلى الحلوين
..........................................
محتاج منك حنين
قربك عطر ورياحين
وجمالك زيه مين
طول ماأنت جنبى
فى حبك سجين
بست الحلوين .. ياأحلى الحلوين
..........................................
هعيش وياك
وأسعد بهناك
وأذوب بهواك
وأستحمل شقاك
وتغرقينى حنين
بست الحلوين .. ياأحلى الحلوين
..........................................
الدنيا  أحلوت معاك
بست الحلوين
خالد المنصوري/مصر
24/2/2020

القصيدة السادسة

مش هسمحلك

مش هسمح حد يكسر نفسي
ولا هسمح يطول يأسي
ولا هعتبره كان موجود
و  ياما الدنيا  بتنسي

مش هسمح انك تجرحني
تيجي عليه وتكسرني
مش هسمح تضيع حريتي
تشوه صورتي  ودمرني

هسيبه يروح بعيد عني
ده فكري انا فيه مسهرني
يغيب ارجع واقول هيعود
يعود الاقيه بيكسرني

حبيبي خلاص انا بايع
ومش هفضل معاك ضايع
ولا هقبل اكون موعود
بعهد عاهدته  كله مواجع

هسيبك والحنين جواك بيداري
وعاشقك ليلي ونهاري
لكن شايفك طريق مسدود
مبدل جنتي بناري

هسيبك اصلي بشتاقلك
وشايف ذلي بيروقلك
مفيش لسؤالي أي ردود
ولا سكوتك هيشفعلك

مش هسمح حد يكسر نفسي
ولا هسمح يطول يأسي
ولا هعتبره كان موجود
و  ياما الدنيا  بتنسي
خالد المنصوري/مصر
20/2/2020

القصيدة السابعة 

حبيبي زاي الملاك

لو قولت انك ملاك
دة قليل عليك
انت وش الملاك
صدقنى مرسوم عليك

لو قولت انك مجنون
قلبك طيب حنون
طاير كدة فى الكون
ترفرف علية فى سكون
معلقنيى بيك بجنون

لو قولت انك خطير
انت اكتر يكتير
مالى حياتى فرحة
وبحبك والله بضمير
وقلبى من وحدتة
نفسة تاخده وتطير

لوقولت انك شيك
دة كتير عليك
حبك زين حياتى
وبفكر فيك ليلاتى
تعالة خدنى ليك

لو قولت انك ملاك
دة قليل عليك
انت وش الملاك
صدقنى مرسوم عليك
دانا بقول عليك ملاك
خالد المنصوري /مصر
17/2/2020

القصيدة الثامنة

جايه تودعني

جايه  تودعني  و أنا  بتوجع
وبتسأل مين فينا  الأجدع
وأفضل أداري وأقول ده قراري
ألقا عيوني عليك بتدمع
قولت نسيتك بس ياريتك
كنت تخيب ظني وترجع
وأفضل أقاسي وأعمل ناسي
وأنا بتمنى لقلبي  تسمع
كبر  قرارنا  زود  نارنا
بس ده مش أخر مشوارنا
لوراح هانفضل كده نعاني
هتفضل  مستسلم وأتحداني
بص في عيني هتعرف حاجة
إن أنا من غيرك  ولا حاجة
وأما تشوف في عيوني الخوف
راح تحضني ومن غير  كسوف
إحنا اتنين أرواحنا في بعض
لو في مكان أو حتى في بعد
وإن  فكرت  لغيرك   أكون
يبقا أموت لو خنت الوعد
جايه تودعني و أنا بتوجع
وبتسأل مين فينا الأجدع
وأفضل أداري وأقول ده قراري
ألقا  عيوني عليك بتدمع
خالد المنصوري/مصر
13/2/2020

القصيدة التاسعة

ليه ياضحكتى

ليه ياضحكتى مخصمانى؟
بعيده عنى وليه هجرانى..
أرجوكى حسى..متنسينيش

لمحتها هناك بعيده..
واقفه وحدك شريده
ناديت عليها..ماسمعتنيش ..

نزلت ع الخد دمعه
وهيا لاشايفه ولاسامعه..
شاورت ليها..ماشفتنيش

رسمتلها ف ورقه ملامحى
كتبتلها إرجعى سامحى..
بعدت عنيها..معرفتنيش..

جريت عليها أقرب..
لمحتنى حاولت تهرب..
صرخت بحرقه..ماحستنيش..

ليه ياضحكتى مخصمانى؟
بعيده عنى وليه هجرانى..
أرجوكى حسى..متنسينيش
خالد المنصوري/مصر
10/2/2020

القصيدة العاشرة

ساكت ليه

ساكت ليه وأنا شايفك حيران
جواك كلام كتير وفـ عيونك حرمان
فكرك شارد وملامحك من غير عنوان
ودنيتك غريبة عنك مفهاش أمان
وحوش بتنهش مفيش بينهم أنسان
ده طعم الحياة من غيرى يا غلبان
لأنك ظلمتنى بقسوتك طعنت فـ المليان
يوم مـ هجرت حياتى وأعلنت العصيان
وقلت يا غالى حاول تانى مع النسيان
مكذبش عليك أنا كنت زى الغرقان
هعيش هموت خوف على ملامحى لتبان
أفتكرت أنى خلاص هصاحب الأحزان
لكن الحقيقة لما حسبتها لقتنى غلطان
ليه الألم  هايعيش على الماضى ندمان
أنا لازم أعيش حياتى سعيد فرحان
زى الطيور فى عشها فوق الأغصان
شايف الدنيا جميلة بكل الألوان
خالد المنصوري/مصر
6/2/2020

زائرنا الكريم : رجاءآ لاتنس الاشتراك بقناتنا تشجيعآ لنا لتقديم الافضل وحتى يصلك كل جديد

  

شكرا لك .. الى اللقاء 

*

*