بوعريشة كريمة

موّال العواذل
شعر : حسام الدين فكري / مصر
.................
مابين الحاجز والحاجز
قول شبرين
وعيونهم فيها أزايز
مبحلقين
عاوزين إيه ياعصابة
يا أشرّ خلق الله
يامخلوقين
من حاجة غير الطين
ياللي الصرمة قليل عليكم
ياحسّادين
ليه باصّين ومرّكزين
في قلبين
بينهم خيط مشدود بالهوى
من سنين
وحاجات ياما ماتتوصفش
بكلمتين
ولاميّة ولا متين
وبعدين يعني
هوه انتوا يعني فاهمين
في الرموش الدايبين
اللي نهارها مغزول بالشقا
وليلها مخنوق بالأنين
وبعدين كمان وكمان
هوه انتوا مين ؟!
وليه كده عاوزين
تخلّوا القلوب الطيبة
على طول متغرّبين
ليه الفُرقة بتبسطكم
وتكيّفكم
هوه انتوا إيه
مش مظبوطين ؟!
عليّا النعمة مش مظبوطين !
وقلوبكم مليها الطين
بتوّلع نار
وتطّق شرار
من لمسة الغرام
ودفا الحنين
مُوتوا بالسمّ اللي جُوّاكم
اللي واكل دماغكم
وشاغلكم عن نفسُكم
ومخلّيكم كده تايهين
في البرد حرّانين
وف عزّ الحرّ بردانين !
داللي بين القُلوب العشقانين
حاجات ولا عُمركم
تلمسوها وتحسّوها
إلا لمّا تغيّروا عيونكم
بعيون تانيين !

زائرنا الكريم : رجاءآ لاتنس الاشتراك بقناتنا تشجيعآ لنا لتقديم الافضل وحتى يصلك كل جديد

  

شكرا لك .. الى اللقاء 

*

*