رثائية الوالد رحمه الله:
يا حسراه الوكر زلتلو بنة
والبيت اللي كان غلق بيبانو
يا ضيمي وشكون بعدك يجملنا
وايروف علينا ونرجو حنانو
كنت الصيد وكنت حامي منزلنا
وكنت ركيزة بيت وانت عمدانو
مزينهم خصلات منك اجملنا
وشيمات الشينين منك ما بانو
واه ايهون عليك يخلا مرسمنا
ونبقاو شفاية وولادك يتهانو
من بعدك محال تحلا لمتنا
وبعدك كل بنين خمل دوزانو
من يوم انصديت حزنت لبتنا
وكل اللي كانو احبابك مابانو
تعرا راسي ودرڤت همتنا
وتعدلت للسوط اكتافي بانو
كيف نديرو يا ابي في عشرتنا
حال الدنيا ضاق بينا بنيانو
اسهفت من ريح بعدك عزلتنا
حصدونا تواز سابق اوانو
فرڤونا وطواو خشبة منسجنا
ولعبو لعب بليس وهوما عوانو
هفونا بالدم والملح اخدعنا
وبحديث تنوفيق وترطاب لسانو
اسكبش من كان عذفة معلشنا
من بعد اتفرطيس اڤرونو بانو
ماهم صيل فحول عادو قادتنا
وما تفرح للتيس من ريح صنانو
ريح روحك يا ابني ماهي ڤمنا
اربط جحش الناس واحذر صكانو
قيلونا واخطو محاصن كورسنا
ويح اللي اتعناه وجابه فرسانو
راها تخرج في اولادك نيتنا
وتسواد لياليك بعد انيزيانو
يمررلك العيش وتزول البنة
ايطيحو ضروس الفم لحڤ نيبانو
لا حجبة مابين ربي وشكانا
وعد من المعبود ربي سبحانو
أ بي عيني ياك عنك ڤلت انا
وبحروف الملحون اكتبت اوزانو
ليلة حد ضلامت الدنيا عنا
غدروك المرين وللعشرة خانو
في الستة وعشرين ليلة مودعنا
خبر الفجعة وزاد اوت بحمانو
من عام التسعين القرن اللي يفنا
زيدو ستة باه يكمل تبيانو
ضاري في الميعاد رافع رايتنا
تفتي تفصل حين حاضر اوانو
لا حيلة لا جور فاتح جلستنا
والعدل ايواتيك وانت عنوانو
الهمة والزين من لدهم شفنا
خيتوسة مع الشاش مخير كتانو
الڤندورة بيضا خياطة جيهتنا
جيلية وسروال عربي عنوانو
لمداسة صباط موكاسة ڤلنا
ولا طرباڤة ومن الجلد امتانو
صيلو صيل ابطال عجزت انسانا
تولد مثلو ذاك عنتر زمانو
ضنيت الجدة كانت ولهانة
يوم اوحمها بيه بخالد وفرسانو
وزاد الاسم عطاه قوة ومتانة
يسعد من سماه وذكرو بلسانو
عن اب الحسنين سمات ابانا
ناصر جيش الحق قاهر عديانو
والكنية تدزيك بلا ما تسألنا
شڤلوفة مردوف كانت كي كانو
عامر شقلوفة
شكرا لك .. الى اللقاء
*
*
لاتنس الاعجاب بصفحتنا عبر الفيس بوك لمتابعتة كل جديد وايضا من اجل التواصل معنا بشكل مباشر ومستمر.
تابعيمكنك الان متابعتنا عبر جوجل بلاس وارسال مقترحاتك وايضا حتى يصلك جميع الموضوعات الحصرية فور نشرها.
تابعتواصل دائما مع اصدقاء يشاركونك نفس الاهتمامات وذلك من خلال متابعة صفحتنا الرسمية عبر تويتر.
تابعيسعدنا أن تكون احد افراد عائلة ومحبى قناة رؤيا للمعلوميات وذلك عن طريق الاشتراك فى قناتنا على اليوتيوب.
تابع